Si të shmangni mashtrimet me prona

Shumica e njoftimeve janë të vërteta, por mashtrime me prona ka në çdo treg. Këto këshilla ju ndihmojnë t'i dalloni. Janë këshilla të përgjithshme dhe nuk zëvendësojnë një jurist ose noter.

Shenjat që duhet t'ju ndalin

• Çmimi është shumë më i ulët se i pronave të ngjashme në të njëjtën zonë.
• Ju kërkohet kapar, depozitë ose "tarifë për ta parë pronën" para se ta keni parë.
• "Pronari" thotë se është jashtë vendit dhe se çelësat do t'ju vijnë me postë pas pagesës.
• Ju nxitojnë: "ka edhe të tjerë të interesuar, paguani sot".
• Pagesa kërkohet me transfertë te një person i tretë, me shërbime dërgimi parash ose me kriptomonedha.
• Personi shmang takimin, telefonatën ose pyetjet për dokumentet.
• Fotot duken si të një hoteli ose i gjeni edhe në njoftime të tjera, me adresë tjetër.

Para se të paguani për një qera

• Shiheni pronën vetë, nga brenda, me personin që e jep me qera.
• Kërkoni një dokument identifikimi dhe një dokument që tregon se personi është pronari ose e përfaqëson atë.
• Bëni kontratë me shkrim, ku shkruhen qeraja, depozita, afati dhe gjendja e pronës.
• Paguani në mënyrë që lë gjurmë dhe merrni dëftesë për çdo pagesë, edhe për depozitën.

Kur blini

• Kërkoni certifikatën e pronësisë dhe verifikojeni te Agjencia Shtetërore e Kadastrës (ASHK): kush është pronari dhe a ka barrë, hipotekë ose sekuestro mbi pronën.
• Shitblerja e një prone bëhet me akt noterial. Mos paguani asgjë jashtë kontratës së nënshkruar te noteri.
• Për një pronë në ndërtim, kontrolloni lejen e ndërtimit dhe kontratën me ndërtuesin.
• Kur shuma është e madhe, paguani një jurist që t'i shohë dokumentet para se të nënshkruani.

Çfarë bën Shtepi.org

• Njoftimi i parë i çdo llogarie të re lexohet nga stafi para se të dalë online, dhe çdo njoftim kalon kontrolle automatike. Hollësitë janë te rregullat e publikimit.
• Çdo njoftim ka butonin "Raporto këtë njoftim". Raportimet shqyrtohen nga stafi.
• Shtepi.org nuk është palë në marrëveshjet mes jush dhe publikuesit dhe nuk i garanton dot njoftimet. Nuk ju kërkojmë kurrë para për të parë një pronë ose për të kontaktuar një publikues.

Nëse dyshoni ose ju kanë mashtruar

• Mos paguani më dhe ruani mesazhet, numrat e telefonit dhe dëftesat.
• Raportojeni njoftimin me butonin në faqen e tij, ose na shkruani te kontakti.
• Nëse keni paguar, njoftoni menjëherë bankën tuaj dhe bëni kallëzim në polici.